Requisitos e modalidades

Para ser titular dunha licenza de pesca marítima de recreo en superficie é necesario ter unha idade mínima de 16 anos. Os menores desta idade quedan exentos, debendo acreditar tal circunstancia documentalmente no momento que así llo requiran os membros do Servizo de Protección de Recursos.

Para ser titular dunha licenza de pesca marítima de recreo submarina requírese ter cumpridos 16 anos, dispoñer dun certificado médico oficial que acredite a aptitude física necesaria para a práctica normal desta actividade, ser titular dun seguro de accidentes e de responsabilidade civil que cubra os incidentes en que puidese incorrer o titular da licenza durante o seu período de validez e estar en posesión da licenza de armas ou tarxeta federativa que a substitúa, todo iso sen prexuízo de cumprir o disposto no artigo 54.4º do Real decreto 137/1993, do 29 de xaneiro, polo que se aproba o Regulamento de armas, ou o que no futuro poida modificalo ou substituílo. Esta modalidade estará suxeita ao cumprimento das normas de seguridade para o exercicio das actividades subacuáticas establecidas por orde do Ministerio de Fomento do 14 de outubro de 1997 (BOE/BOE nº 280, do 22 de novembro), ou ao que no futuro poida modificala ou substituíla.

A pesca marítima de recreo poderá ser en superficie, desde terra ou desde unha embarcación deportiva ou de recreo, e submarina, nadando ou mergullando en apnea.